《我的筍盤男友》（2020）

\\

《我的筍盤男友》（2020）

對上一次睇港產片已經係講緊《寒戰2》

本身無諗住睇呢套，因為葉念琛嘅愛情片真係唔係好啱我，但有人話好睇，又話我同入面一個演員好似樣喎，好奇心驅使之下，就睇下啦。

\

葉念琛，MK界嘅殿堂級人物，一手捧紅咗MK界金童玉女，《獨家試愛》《十分愛》《我的最愛》三部曲論盡MK愛情哲學，為香港影史上嘅不朽鉅作。

識好多人都唔係好中意葉大導嘅電影，無他，就係因為佢嘅戲實在太一針見血，講出MK愛情係爾虞我詐，絕對唔會有好結果，令人黯然神傷，默默垂淚。

好多自命清高嘅人都扮無睇過葉大導嘅戲，但其實心中早已為佢嘅電影留下重要一席。

\

吹唔到落去了，呢套戲名基本上已經講晒成個故事大綱出嚟，都係善良窮妹感動到年青有為有錢有樣嘅富豪，跟著又因為大家身份地位唔同而有感情波折搞到分手，最後排除萬難發現對方係一生中最愛之後復合，完。

當然唔可以少得經典對白「我地係兩個世界嘅人」「唔係你諗咁樣㗎」，劇情張力巨大，引人入勝。

劇情方面，上半部份是男女主角相識的經過，中間嘅細節就唔好提，講出嚟只會覺得戲入面所有角色都係弱智……總之男主角好欣賞阿寶嘅善良啦，唔好問咁多。

後半部係講兩個人正式係埋一齊，劇情先叫正常啲，男女主角開始意識到雙方都存在價值觀、生活習慣嘅分歧，最後因為一場誤會，萬眾期待嘅愛情合約終於出場喇!咁無辦法，唯有分手啦。

睇一睇個進度條，咦得返15分鐘，於是係淨低嘅10分鐘內，二人分別火速回想起過去嘅甜蜜時光，確認中家係一生中最愛，於是復合，完。

我覺得其實前半部份嘅相識經過可以短少少，反正啲笑位好夾硬，不如落多啲戲份去後面好過，至少唔會好似而家咁急住收尾咁款。

我硬係形住片尾男主角會msg前女友話我忘不了你，女主角又會暗地表示自己真係只中意男主角啲錢，對MK愛情作出血的控訴，不過無。如果呢套唔係賀歲片，我相信會有嘅。

\

我諗劇情真係無咩好講，大家當係睇仔睇女會好啲。

女主角李靖筠演技有啲生硬，不過前期扮低B妹恰到好處，後尾要正常返啲就carry唔到了。男主角林盛斌，吖唔係，陳家樂靚仔大隻，除衫露肌睇怕都係葉大導送比女觀眾嘅大禮，不過整體都係差阿Bob少少。

\

TLDR: 嗯……簡單嚟講我覺得呢套戲呢，睇主題曲嗰MV都夠晒，真係好中意睇仔睇女嘅，就睇啦，睇阿Bob一個都夠你回味無窮。

#無錯我就係畀人話似阿Bob

#呢篇嘢已經打得好輕手

#孽念深